ꆀꃅꈎꏅꇁꄮꀿꃀꉂ

ꁱꊿ：ꃬꑭꃁꇖ

ꀘꊿ：ꐚꑕꒈꎆ

ꆀꃅꈎꏅꑟꇁꄮ,

ꌞꌺꌞꅪꈀꐥꌠ,

ꏣꎼꑟꈴ,

ꆀꃅꐥꑌꀱꇁꃲ,

ꎆꎹꋚꈹ,

ꉷꃅꐥꑌꀱꇁꃲ,

ꑓꆫꑓꈩ,

ꃅꑆꉈꄅꐺꑌꀱꇁꃲ,

ꀱꇁꆺꑳꏂꃴꄉ,

ꀿꇁꃀꐮꈎꏅꇁꀐꂼ。

ꈌꆹꂿꉘꌌꇁꀿꃀꍈ,

ꎧꏸꀿꈌꃹ,

ꉦꃅꉦꏵꀕ,

ꀿꄿꌺꄿꐊ,

ꉌꈯꑓꈜꃅ,

ꎧꏸꆏꊏꉢꄎꃅ,

ꈍꃅꈜꀕꌒꀒ!

ꎬꐚꃀꈌꃹ,

ꉐꀑꐓꂿꀕ,

ꃀꄿꅪꄿꐊ,

ꉌꇿꑓꇿꃅ,ꎬꐚꆏꊏꉢꍈꃅ,

ꈍꃅꈜꀕꌒꀒ!

ꃢꃅꈚꎔꀿꃀꇢ,

ꎿꁁꀌꄟꀿꀑꅑ,

ꌀꄝꏪꃚꏀ,

ꆞꑭꊖꇱꄔ,

ꈄꃅꈄꒉꋦ;

ꌺꄿꀉꄉꑌ,

ꏜꎔꏜꃨꆹ,

ꉘꇉꃪꊭꏜ,

ꒇꇁꇤꉎꈈ,

ꁍꇁꀿꋩꂯ!

ꏦꍠꂃꎔꀋꃀꇢ,

ꂃꑭꃽꇗꀕ,

ꂃꂪꑶꌩꃅ,

ꎔꃅꎔꒉꋦ;

ꅩꄿꀉꂿꑌ,

ꃮꀠꎔꌠꆹ,

ꌌꀑꉐꐑꐥ,

ꅸꇁꉻꇬꊐ,

ꁍꇁꀿꋩꂯ!

ꉢꀉꑳꆗꉼꑠꍈꑌ,

ꀉꄉꀉꂿꐥꇬꆹ,

ꉢꑌꑠꃅꈎꏅꋻꑴꇆ!

ꀃꑍꋋꄮꆏ,

ꀿꃀꑲꅉꆹ,

ꃷꇎꑲꅉꐛꇈꃲ,

ꀿꃀꁍꑘꆹ,

ꃷꇎꁍꑘꐛꇈꃲ,

ꀿꃀꌩꁍꆹ

ꃷꇎꌩꁍꐛꇈꃲ,

ꀿꃀꁮꅰꐂꃨꑌ,

ꃷꇎꁮꅰꐛꇈꃲ,

ꀿꃀꃮꀠꐚꋩꑌ,

ꃷꇎꃮꀠꐛꇈꃲ。

ꉢꀉꑳꆗꉼꈍꃅꂯ?

ꈎꏅꇁꄮꀿꃀꉂꇁꃲ,

ꀉꄉꇆ!ꀉꂿꇆ!

ꅽꌺꇿꇬꏅꁧꂯ?

ꀋꏅꂯꇬꑌ,

ꀿꒌꃀꒌꐥꐯꏦ,

ꏅꇁꂯꇬꑌ,

ꈎꏅꃮꀠꇿꇬꎹꁧꂯ?

ꃮꄀꏣꀨꇿꇬꎹꁧꂯ?

ꃮꌉꅅꃅꇿꇬꎹꁧꂯ?

ꃮꏬꉽꐯꇿꇬꎹꁧꂯ?

ꈴꏬꆡꁠꇿꇬꎹꁧꂯ?

ꃮꌌꈴꏬꇿꇬꄉꁧꂯ?

ꎧꒉꎧꏸꇿꇬꄉꁧꂯ?

ꁍꇁꀿꒌꇿꇬꉙꁧꂯ?

ꁍꋩꀿꋩꇿꇬꋩꁧꂯ?

ꆿꇂꍯꒌꇿꇬꈎꁧꂯ?

ꑌꇁꑿꒌꇿꇬꈎꁧꂯ?

ꃅꇁꇌꒌꇿꇬꈎꁧꂯ?

ꁍꁈꁧꏷꇿꇬꏹꁧꂯ?

ꍲꈄꈜꁧꇿꇬꈷꁧꂯ?

ꑭꎅꉈꑴꇿꇬꑃꁧꂯ?

ꇇꎇꂴꆽꇿꇬꈻꁧꂯ?

ꊈꌐꃮꇇꈀꄸꍈꁧꂯ?

ꊈꌐꎧꏸꈀꄸꄐꁧꂯ?

ꊈꌐꎵꃀꈀꄸꄐꁧꂯ?

ꊈꌐꃬꏿꈀꄸꍈꁧꂯ?

ꊈꌐꎸꄃꈀꄸꍈꁧꂯ?

ꊈꌐꃮꌌꈀꄸꍈꁧꂯ?

ꊈꌐꆡꁠꈀꄸꍈꁧꂯ?

ꉢꀉꑳꆗꉼꑠꍈꑌ,

ꆀꃅꈎꏅꇁꄮꆏ,

ꀿꐮꌺꈩꌒꌠꎺꇁꃲ,

ꃀꐮꅪꈩꌒꌠꎺꇁꃲ,

ꃮꌌꀿꃀꍈꌠꎺꇁꃲ,

ꈴꏬꀿꃀꍈꌠꎺꇁꃲ,

ꎧꏸꀿꃀꄐꌠꎺꇁꃲ,

ꏸꎔꃀꆐꏂꌠꎺꇁꃲ,

ꆿꇂꍯꂂꇁꌠꎺꇁꃲ,

ꆜꎔꂷꏾꌠꌡꎺꇁꃲ,

ꊿꇬꋬꂻꇁꌠꎺꇁꃲ,

ꑌꑿꀻꎆꇁꌠꎺꇁꃲ,

ꅪꇁꌱꏦꐩꌠꎺꇁꃲ,

ꑮꑟꃅꏸꋦꌠꎺꇁꃲ,

ꀿꃀꇗꄃꀕꌠꎺꇁꃲ,

ꅪꏷꌐꅍꎭꌠꎺꇁꃲ,

ꌐꎔꋍꉻꏂꌠꎺꇁꃲ,

ꏮꇴꏮꐱꇁꌠꎺꇁꃲ。

ꀉꄉꇆ!ꀉꂿꇆ!

ꉢꀉꑳꆗꉼꑠꍈꑌ,

ꎺꑌꀈꈥꎺꀐꂼ,

ꀿꃀꉂꑌꀈꈥꉂꀐꂼ!

ꆀꃅꈎꏅꇁꀐꂼ!

ꈜꀕꀿꇁꃀꉂꇁꀐꂼ!